Komandanti i misionit të KFOR-it të udhëhequr nga NATO, Gjeneral Major Ozkan Ulutash, ka pritur në takim shefin e Misionit të Vëzhgimit të Zgjedhjeve të Asamblesë Parlamentare të Këshillit të Evropës (PACE), Yunus Emre.
Takimi është mbajtur në selinë e KFOR-it në Kampin Film City, në Prishtinë, dhe ka shërbyer si mundësi për shkëmbimin e pikëpamjeve lidhur me situatën e sigurisë në Kosovë, si dhe për theksimin e rolit të KFOR-it në garantimin e një mjedisi të sigurt dhe të qëndrueshëm.
Sipas njoftimit të KFOR-it, gjatë takimit u riafirmua përkushtimi i këtij misioni për zbatimin e mandatit të tij, të bazuar në Rezolutën 1244 të Këshillit të Sigurimit të OKB-së, me qëllim të ruajtjes së sigurisë dhe lirisë së lëvizjes për të gjithë qytetarët në Kosovë.
Po ashtu, u theksua se KFOR vazhdon të veprojë në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në kuadër të përgjegjësive të tyre për sigurinë në vend.
