Përfaqësuesja e Mbretërisë së Bashkuar në OKB, Jennifer MacNaughtan në seancën e Këshillit të Sigurimit të OKB-së që po mbahet sot ka thënë se Serbia duhet të sjellë para drejtësisë persona përgjegjës për sulmin terrorist në Banjskë, përfshirë kryeterroristin Milan Radoiçiq.
Ai poashtu ka kërkuar llogaridhënie për sulmet ndaj pjesëtarëve të KFOR-it në maj të vitit 2023.
“Mirëpresim themelimin e Komisionit për Personat e Zhdukur dhe implementimin e Ligjit për të Huajt. Përsërisim thirrjen ndaj Serbisë që të luajë rolin e saj për të ulur tensionet dhe për të sjellë para drejtësisë personat përgjegjës, përfshirë këtu edhe Radoiçiqin. Gjithashtu, bëjmë thirrje për llogaridhënie për sulmet kundër KFOR-it dhe personelit të Policisë së Kosovës në maj të vitit 2023”, u shpreh ajo.
Përfaqësuesja britanike u bëri thirrje shteteve anëtare të OKB-së ta njohin pavarësinë e Kosovës.
“Ne i inkurajojmë ato shtete anëtare që nuk e kanë bërë ende këtë, t’i bashkohen shumicës. Siç e ka theksuar, Gjykata Ndërkombëtare e Drejtësisë, shpallja e pavarësisë së Kosovës nuk ka qenë shkelje e së drejtës ndërkombëtare. Njohja është esenciale për stabilitetin afatgjatë dhe për shfrytëzimin e plotë të potencialit të Kosovës”, u shpreh ajo.
Mbretëria e Bashkuar ka vlerësuar gjithashtu zhvillimet e fundit politike në vend, duke përgëzuar mbajtjen paqësore të zgjedhjeve dhe formimin e institucioneve të reja. Mirëpo përfaqësuesja ka inkurajuar edhe procesin për zgjedhjen e presidentit në përputhje me Kushtetutën.
