Përfaqësuesja e Danimarkës në Këshillin e Sigurimit të OKB-së, Christina Markus Lassen, gjatë një mbledhjeje të fokusuar në punën e UNMIK-ut, ka bërë thirrje që Serbia të ndalë pengesat ndaj Kosovës në rrugën e saj drejt anëtarësimit në organizata ndërkombëtare.
Ajo theksoi rëndësinë e zbatimit të marrëveshjeve ekzistuese me mirëbesim dhe kërkoi angazhim konkret nga pala serbe për të siguruar drejtësi lidhur me sulmin në Banjskë, duke kërkuar që përgjegjësit të dalin para drejtësisë.
“Për Serbinë kërkohet që të përmbahet nga pengimi i Kosovës që të përfshihet në organizata ndërkombëtare. Marrëveshjet duhet të zbatohet në mirëbesim. Dhe kërkohen hapa konrekret nga Serbia për të siguruar llogaridhënie duke i sjellur kryesit e sulmit të Banjskes para drejtësisë. Kjo është një çështje që vazhdon të ndikojë negativisht”, tha Lassen.
Në të njëjtën kohë, ajo inkurajoi mbajtjen e një takimi të nivelit të lartë ndërmjet palëve, me synimin për të avancuar dialogun dhe për të arritur rezultate konkrete në procesin e normalizimit.
