Profesori Sylë Ukshini, në emisionin “Info Nata” në Tëvë1, ka folur për ngërçin politik lidhur me zgjedhjen e presidentit në Kosovë.
Ai theksoi se opozita duhet të jetë prezente në sallë edhe nëse nuk ka një kandidat të vetin, duke shtuar se në atë rast duhet të votojë për kandidatin që propozohet.
“Nëse opozita nuk ka një emër për president, atëherë duhet të qëndrojë në sallë dhe të votojë për atë që propozohet.”
Ukshini u shpreh se situata politike ka ndryshuar dhe tashmë çështja e presidentit duhet parë me më shumë pragmatizëm, duke përmendur edhe rolin e partive politike ndër vite.
“LDK para pesë viteve, pa asnjë kusht, e ka votuar ose së paku i ka bërë numrat për Vjosa Osmanin. Prandaj, edhe tani duhet të ketë një qasje të tillë dhe të kalkulohet mirë.”
Ai përmendi edhe mundësinë e emrave të tjerë për president, duke theksuar se, sipas tij, disa figura mund të ishin alternativa më të mira.
“Glauk Konjufca do të ishte një president shumë më i mirë se Vjosa Osmani, por duhet të shihet nëse ka kompromis politik.”
Në lidhje me mundësinë që Lëvizja Vetëvendosje t’ia lërë pozitën e presidentit opozitës, Ukshini u shpreh skeptik, por nuk e përjashtoi plotësisht një skenar të tillë.
“Duket e vështirë, por nëse Vjosa Osmani kalon te LDK-ja dhe merr mbështetje, atëherë situata mund të komplikohet dhe të hapen pikëpyetje edhe për Vetëvendosjen.”
