Presidenti ukrainas, Volodymyr Zelensky u ka thënë gazetarëve se do të ishte i gatshëm të tërhiqte trupat nga zemra industriale lindore e vendit, si pjesë e një plani për t’i dhënë fund luftës së Rusisë, nëse edhe Moska tërhiqet dhe zona bëhet një zonë e demilitarizuar dhe e lirë ekonomike e monitoruar nga forcat ndërkombëtare.
Propozimi shënon treguesin më të qartë deri më tani të kompromiseve që udhëheqësi ukrainas do të ishte i gatshëm të bënte në rajonin e Donbasit, kontrolli i të cilit është një pikë e rëndësishme pengese në negociatat e paqes.
Një marrëveshje e ngjashme mund të jetë e mundur për zonën përreth termocentralit bërthamor Zaporizhzhia , i cili aktualisht është nën kontrollin rus, deklaroi Zelensky, transmeton Associated Press.
Ai poashtu tha se çdo plan paqeje do të duhet të vihet në një referendum.
Zelensky foli me gazetarët të martën për të përshkruar një plan gjithëpërfshirës prej 20 pikash që negociatorët nga Ukraina dhe SHBA-ja e hartuan në Florida ditët e fundit, megjithëse tha se shumë detaje janë ende duke u diskutuar.
Rusia nuk ka dhënë asnjë shenjë se do të bjerë dakord për ndonjë lloj tërheqjeje të trupave të saj nga toka që ka pushtuar.
Në fakt, Moska ka këmbëngulur që Ukraina të heqë dorë nga territori i mbetur që ende mban në Donbas – një ultimatum që Ukraina e ka refuzuar.
Rusia ka pushtuar pjesën më të madhe të Luhanskut dhe rreth 70% të Donetskut – dy zonat që përbëjnë Donbasin.
Zëdhënësi i Kremlinit, Dmitry Peskov, ka thënë të mërkurën se Moska do të paraqiste qëndrimin e saj bazuar në informacionin e marrë nga i dërguari presidencial rus, Kirill Dmitriev, i cili u takua me të dërguarit amerikanë në Florida gjatë fundjavës.
