Pas humbjes befasuese nga Rumania (3:0), Ukraina ka regjistruar fitoren e parë në “Euro 2024”.
Në xhiron e dytë të fazës së grupeve, Ukraina triumfoi me përmbysje të rezultatit ndaj Sllovakisë.
Dueli i luajtur në Dusseldorf, që i takoi Grupit E përfundoi me rezultatin e ngushtë 2:1 në favor të Ukrainës.
Me këtë fitore, Ukraina ka tubuar tri pikë kurse Sllovakia ka regjistruar humbjen e parë pas fitores ndaj Belgjikës dhe tani të dyja kombëtaret kanë pikë të njëjta.
Sllovakia kaloi në epërsi në minutën e 17-të, me golin e realizuar nga Ivan Schranz dhe me rezultatin 1:0 u mbyll pjesa e parë e takimit.
Ukraina u kundërpërgjigj në pjesën e dytë, duke shënuar dy gola dhe siguruar fitoren.
Fillimisht, Mykola Shaparenko barazoi rezultatin në minutën e 54-të, përpara se rezervisti Roman Yaremchuk të shënoj golin e fitores në minutën e 80-të.
Ndeshjen e fundit në grup, Ukraina e luan me Belgjikën kurse Sllovakia përballet me Rumaninë.
