Të rreshtuar një pas një po presin urdhrin për sulm.
Kjo pasi armikun e kanë shumë afër dhe reagimi i tyre është jetik.
Janë këta ushtarët e Forcës së Sigurisë së Kosovës të cilët po zhvillojnë ushtrimin fushorë “Ujku Shigjetë”.
E ky operacion u bë në zonën ushtarake në Babaj të Bokës në Gjakovë.
Ky ushtrim fushor po bëhet për të testuar aftësitë dhe kapacitetet ushtarake të Forcës së Sigurisë së Kosovës.
Nga afër të gjithë operacionet ushtarake po vëzhgohen nga udhëheqësit e FSK-së, Ministrisë së Mbrojtjes, e ushtarët amerikanë.
Veç se në këtë ushtrim nuk u pa komandantja supreme e Forcës së Sigurisë së Kosovës, Vjosa Osmani e kryeministri në detyrë, Albin Kurti.
E para të pranishmëve pati demonstrim edhe të qitjes së zjarri deri në neutralizimin e armikut.
Para mediave për rëndësinë e këtij ushtrimi foli edhe ministri në detyrë i Mbrojtjes, Ejup Maqedonci.
“Sot është një ditë shumë e rëndësishme për ushtrinë tonë Forcën e Sigurisë së Kosovës sepse sot po përmbyllim një prej objektivave kryesore të planit zhvillimor të Forcës së Sigurisë së Kosovës atë të certifikimit dhe validimit të të gjitha kapaciteteve të këmbësorisë regjimenteve të këmbësorisë së FSK-së. Pra, me këtë ushtrim ne po përmbyllim një fazë dhe po kalojmë në një fazë tjetër kemi marr masat dhe jemi duke u përgatitur për ta finalizuar. Me këtë rast falënderoj komandantin e FSK-së gjeneral Jasharin për punën e jashtëzakonshme dhe angazhimin e pashembullt për të arritur objektivat pavarësisht sfidat”, tha Maqedonci.
Ky ushtrim u bë me qëllim që të vlerësohet gatishmëria operacionale e ushtarëve të FSK-së dhe standardëve të kërkuar për validim.
Koordinimi ndërmjet njësive ishte jetik që ushtarët të arrinin qëllimin e paracaktuar.
Poashtu ushtarët u vlerësuan edhe për qitjen dhe veprimet që ndërmorën gjatë gjithë këtij ushtrimi.
Ushtrimi fushor “Ujku Shigjetë” ka nis më 20 tetor dhe përfundon më 29 tetor.
Forca e Sigurisë së Kosovës duke u bazuar në Planin Gjithëpërfshirës të Tranzicionit, është duke ngritur kapacitetet operacionale të njësive, bazuar në misionin e tyre. Andaj në kuadër të këtij ushtrimi është validuar Regjimenti i Tretë i Këmbësorisë.
