UEFA e ka dënuar Federatën e Futbollit të Kroacisë sërish. Kështu ka njoftuar Federata kroate të shtunën në faqen zyrtare.
“UEFA e ka dënuar Federatën e Futbollit të Kroacisë me 28 mijë euro në total. Me 17,500 euro është dënuar për ndezje të fishekzjarrëve dhe me 10,500 euro për hedhje të objekteve në fushë nga disa tifozë kroatë, në ndeshjen Kroacia – Shqipëria, që u zhvillua më 19 qershor në Hamburg”, ka shkruar Federata e Futbollit të Kroacisë.
Sajti kroat “Index.hr” ka shkruar se ende nuk dihet për dënimin tjetër të mundshëm për Federatën e Futbollit të Kroacisë, në lidhje me sjelljet raciste dhe diskriminuese të tifozëve.
UEFA të enjten njoftoi se Kroacia dhe Shqipëria janë në procedurë disiplinore.
Kroacia në këtë Evropian është dënuar edhe me 87,875 euro për incidentet në duelin kundër Spanjës.
Dënimi i përgjithshëm për Kroacinë nga të dyja rastet ka mbërritur shifrën e 115,875 eurove.
