Në mbledhjen e Kuvendit Komunal të Vushtrrisë të mbajtur më 27 tetor 2022 dyshohet se në pikën e rendit të ditës për ndërtimin e lapidarit në fshatin Pasomë është votuar në vend të dy asamblistëve të cilët nuk kanë qenë në sallë, përcjellë teve1.info.
Ndërkohë, Seanca e 27 tetorit ishte transmetuar drejtpërdrejt në faqen zyrtare të Facebook-ut të Komunës së Vushtrrisë, por pastaj një pjesë e seancës nuk është gjetur në të njëjtën faqe.
Përmes një komunikate për media, Dega e LDK-së në Vushtrri ka njoftuar po ashtu se Ministria e Administrimit të Pushtetit Lokal e ka anuluar vendimin e nxjerrë me vepër penale.
Postimi i plotë i LDK:
Siç kemi deklaruar me kohë, Dega e LDK në Vushtrri ka dorëzuar kallëzim penal në Prokurori Speciale ndaj zyrtarëve të lartë komunal, për shkak të dyshimit të kryerjes së veprave penale:
- Keqpërdorim i pozitës zyrtare- Ekziston dyshimi i arsyeshëm, se zyrtarë të lartë komunal, me dashje dhe në bashkëpunim, e kanë keqpërdorur pozitën zyrtare dhe autoritetin, duke mundësuar kalimin e një vendimi në Kuvend të Komunës së Vushtrrisë në atë mënyrë që më 27 tetor 2022 dyshohet se në pikën e rendit të ditës për ndërtimin e lapidarit në fshatin Pasomë, është votuar në vend të dy asambilstëve të cilët nuk kanë qenë në sallë.
- Asgjësimi apo fshehja e materialit arkivor nga Neni 408 i KPRK-së- Ekziston dyshimi i arsyeshëm se të njëjtit persona, duke ushtruar ndikimin e tyre sipas pozitës zyrtare, e kanë fshirë video gjirmin live të seancës së Kuvendit të Komunës së Vushtrrisë, pjesën e dytë të video gjirimit live të seancës së datës 27 tetor 2022 kur është votuar për pikën e rendit të ditës për ndërtimin e lapidarit në fshatin Pasomë, me qëllim të fshehjes së gjurmëve duke asgjësuar kështu materialin arkivor të Komunës së Vushtrrisë.
Ministria e Administrimit të Pushtetit Lokal e ka anuluar vendimin e nxjerrë me vepër penale.
LDK dega në Vushtrri është e përkushtuar për ligjshmëri në Komunën e Vushtrrisë.
