Është gjetur e vdekur në lumi Lumbardh gruaja që ishte shpallur e zhdukur para dy ditësh në Deçan.
Policia ka njoftuar se viktima është gjetur rreth orës 14:00 në rrjedhën e ujit në fshatin Broliq të Deçanit.
Vdekjen e saj e ka konstatuar ekipi mjekësor në vendin e ngjarjes.
“Sot me datën 14.05.2026, rreth orës 14:00, pas kërkimeve të bëra është gjetur një person i gjinisë femërore, ne ujë në fshatin Broliq-Deçan, në vendin e ngjarjes nga ekipi mjekësor është konstatuar vdekja e viktimës, ndërsa nga familjarët është bërë identifikimi i saj e cila ishte shpallur si person i zhdukur me datë 12.05.2026, me urdhër të Prokurorit të shtetit trupi i pajetë i viktimës dërgohet në institutin e mjekësisë ligjore në Prishtinë për obduksion”, ka thënë, zëdhënësi i Policisë, Driton Rugova.
Viktimën e ka gjetur Forca e Sigurisë së Kosovës, e cila është angazhuar me kërkesë të Qendrës së Situatave.
“FSK gjen trupin e pajetë në lumin Lumbardh. Me kërkesën nga Qendra e Situatave të Qeverisë së Republikës së Kosovës, dhe me urdhër të Komandantit të Forcës së Sigurisë së Kosovës, FSK ka marrë të gjitha masat, duke angazhuar ekipet e Kërkim Shpëtimit ujor të Gardës Kombëtare, të cilat kanë vepruar në bashkëpunim dhe koordinim me autoritetet lokale të Komunës së Deçanit dhe Policinë e Kosovës. Pas kërkimeve intensive ekipet e Kërkim Shpëtimit ujorë të FSK-së, kanë arritur të gjejnë trupin e pajetë me inicialet SH.P.”, thuhet në njoftimin e FSK-së.
