Shkolla “Bedri Pejani” ka kërkuar një qëndrim se si të veprojë me 18-vjeçaren e cila u përjashtua nga shkolla për shkak të mbulesës. Por drejtori i shkollës thotë se ende nuk ka marrë ndonjë përgjigje. E fajtor për këtë gjendje, deputetja e Vetëvendosjes po e lë Ministren e Arsimit, Arbërie Nagavcin.
As këtë të martë, gjimnazistja me shami nuk u ulë në bankat e shkolllës “Bedri Pejani” në Pejë.
18-vjecarja vazhdon të mbetet e përjashtuar nga shkolla.
Drejtori i shkollës “Bedri Pejani” vendosi të respektojë udhëzimin administrativ që ndalon uniformat fetare.
E se si të veprojë tutje, drejtori Musa Nikqi thotë se ka kërkuar sqarim nga Ministria e Arsimit se si të veprojë por ende as sot nuk ka marrë përgjigje.
“Jo nuk është rikthyer ende. Kam kërkuar nga Ministria e Arsimit që të del me një qëndrim se në fund të fundit ajo është përfaqësuesja që u mbron udhëzimet dhe ligjet në fuqi të Ministrisë së Arsimit. Të del me një rekomandim që të me jep një letër që unë të kem bazë ligjore”, tha drejtori Musa Nikqi.
Përgjigje Ministria e Arsimit rreth këtij udhëzimi nuk i ka kthyer as televizionit.
Sipas Bashkësisë Islame të Kosovës, ky udhëzim administrativ është në kundërshtim me Kushtetutën.
Nga ky institucion thonë se mbulesa nuk konsiderohet uniformë fetare.
“Këtu po interpretohet si një uniformë fetare, ne duhet të kuptojmë se çka është uniforma dhe çka është obligimi fetar në rastin konkret nuk kemi të bëjmë me uniforme fetare, uniforma është uniforma e policisë, e ushtrisë këtu nuk kemi të bëjmë me një uniformë që është e njëjtë, sepse mbulesa është obligim fetar prandaj ne reagojmë ashpër ndaj këtij vendimi që ka marr drejtori i shkollës dhe bëjmë apel të mos shkelen ligjet në fuqi dhe të lejohet shkollimi i vajzës”, tha sekretari i BIK-ut, Ahmet Sadriu.
E padrejtësi largimin e 18-vjecarës nga gjimnazi e quan edhe deputetja nga radhët e Vetëvendosjes.
Labinotë Demi – Murtezi, e lë fajtore ministren Nagavci për gjithë këtë situatë.
“Barra kryesore bije mbi Ministrin e Arsimit, Shkencës dhe Teknologjise, me respektivisht mbi Ministren e Arsimit e cila nuk po merr mundin ta plotësoj këtë udhëzim administrativ me fjalinë e vetme që mbulesa nuk është uniforme fetare pa prekur pikat tjera të udhëzimit pasi udhëzimi është i gjerë përfshin edhe gjera tjera, keqkuptimi është se mbulesa nuk është uniformë fetare”, tha Demi-Murtezi.
Demi thotë se i kishte kërkuar bashkëpartiakes së saj ta ndryshojë këtë udhëzim, por ende s’ka asnjë veprim konkret.
“Po disa herë kemi diskutuar me Ministren përgjigja e saj ka qenë se do të angazhohet personalisht që të mos mbetet asnjë vajzë pa shkollim çka ka dashtë me thënë më këtë personalisht ende nuk e kam kuptuar ne kemi rekomanduar do të ishte kjo, shpresoj shumë që ministrja të reflektoi pas këtij incidentit të fundit”, tha deputetja.
Prokuroria Themelore të hënë bëri të ditur se ka nisur hetimet për këtë rast, por drejtori i shkollës, Musa Nikqi, për tëvë 1 tha se ende nuk është intervistuar.
