Emri i tij është njëri nga me të përfolurit në Spanjë. Fjala është për futbollistin nga Kosova, Vedat Muriqi i cili së fundmi është bërë objektiv i skuadrave spanjolle.
Shtatëlarti po shkëlqen në fanellën e Mallorcës, me të cilën skuadër e nisi me këmbë të mbarë vitin 2023. Ai në ndeshjen e parë të këtij viti realizoi një gol, e dhuroi një asistim në sfidën e Kupës së Mbretit.
Sulmuesi shqiptar ka realizuar 13 gola në 18 ndeshje deri tash me klubin ishullor, ku ishte transferuar nga Lazio gjatë verës së kaluar, pasi në gjysmën e parë të vitit luajti në formë huazimi.
Sipas mediave në Spanjë, Atletico Madridi është mjaft i interesuar për shërbimet e 28 vjeçarit. Trajneri Diego Simeone e ka të preferuar grintën e tij para portës, dhe e dëshiron Muriqin që ta ketë nga sezoni i ardhshëm në skuadër.
Los Colchoneros janë të gatshëm të paguajnë 15 milionë euro për kartonin e “Piratit” në verën që vjen, por klubi aktual I 28-vjeçarit kërkon të paktën 20 milionë euro, shumë kjo që mund edhe të paguhet nga Atletico Madrid.
Megjithatë për këtë duhet të merren klubi aktual dhe agjenti i sulmuesit prizrenas, pasi Muriqi ka mendjen diku tjetër, të arrijë të ndihmojë Mallorcan në objektivat e këtij sezoni.
