NATO thotë se të enjten, Këshilli i Atlantikut të Veriut autorizoi forca shtesë nga Mbretëria e Bashkuar, që nëse është e nevojshme të jenë në dispozicion për situatën aktuale në veri të Kosovës.
Pas sulmit terrorist ndaj Policisë së Kosovës nga grupi i armatosur serbë, NATO thotë se ka rritur praninë e KFOR-it dhe aktivitetin e tij në veri dhe në zonat përreth kufirit, në mënyrë që të sigurojë një mjedis të sigurt.
“Dje, Këshilli i Atlantikut të Veriut autorizoi forca shtesë nga Mbretëria e Bashkuar, nëse është e nevojshme, për të adresuar situatën aktuale. Ne nuk komentojmë detaje specifike operacionale. Në dritën e zhvillimeve të fundit, KFOR-i po rrit praninë dhe aktivitetin e tij në veri të Kosovës dhe në zonat përreth kufirit për të siguruar që ai të vazhdojë të përmbushë mandatin e tij për të ofruar një mjedis të sigurt dhe të sigurt për të gjithë njerëzit që jetojnë në Kosovë”, thuhet në përgjigjen e NATO-s për Tëvë1.
Nga NATO janë deklaruar se janë të gatshëm të bëjnë rregullime të mëtejshme në qëndrimin e KFOR-it sipas nevojës.
“Ne gjithmonë do të vazhdojmë të sigurohemi që komandanti ynë të ketë burimet dhe fleksibilitetin e nevojshëm që KFOR-i të përmbushë mandatin e tij. Ne jemi të gatshëm të bëjmë rregullime të mëtejshme në qëndrimin e KFOR-it sipas nevojës”, thuhet mes tjerash në përgjigje.
Ndërkohë, kryeministri i Kosovës, Albin Kurti, sot ka mirëpritur vendimin e NATO-s për të forcuar trupat e saj në rajonin e vendit.
Kurti ka deklaruar se sulmi ndaj Policisë së Kosovës më 24 shtator në Banjskë të Zveçanit ilustron përpjekjet e Serbisë për të destabilizuar Kosovën, me ndihmën e aleates së saj, Rusisë.
Në një intervistë për AP, edhe presidentja e Kosovës, Vjosa Osmani, ka mirëpritur vendimin e NATO-s.
Osmani edhe Kurti e cilësuan sulmin e 24 shtatorit si një “akt agresioni” ndaj Kosovës dhe kanë kërkuar që Serbia të ndëshkohet./teve1.info/
