Kryeministri i Kosovës, Albin Kurti, sot ka mirëpritur vendimin e NATO-s për të forcuar trupat e saj në rajonin e vendit.
Kurti ka deklaruar se sulmi ndaj Policisë së Kosovës më 24 shtator në Banjskë të Zveçanit ilustron përpjekjet e Serbisë për të destabilizuar Kosovën, me ndihmën e aleates së saj, Rusisë.
“Këta njerëz duan ta kthejnë kohën pas”, tha kryeministri Kurti për Associated Press, përcjellë teve1.info
“Ata janë në kërkim të një makine kohe. Ata duan ta kthejnë orën 30 vjet pas. Por kjo nuk do të ndodhë”, ka thënë Kurti.
Në një intervistë për AP, edhe presidentja e Kosovës Vjosa Osmani përshëndeti vendimin e NATO-s.
Osmani edhe Kurti e cilësuan dhunën e fundjavës si një “akt agresioni” ndaj Kosovës dhe kërkuan që Serbia të ndëshkohet.
“Ne shpresojmë që bashkësia ndërkombëtare do t’i përgjigjet në mënyrën e duhur këtij akti agresioni, në radhë të parë duke e dënuar atë, por pastaj edhe pasi të kenë përfunduar procedurat e brendshme të konfirmimit të informacionit, të ndërmarrin masa të qarta ndaj Serbisë”.
Osmani iu referua presidentit të Serbisë Aleksandar Vuçiq si një “prokurë” i homologut të tij rus Vladimir Putin.
“Dhe është shumë e qartë tani për të gjithë, madje edhe për ata që kishin ndonjë dyshim, se ai po luan planin e Rusisë në Ballkanin Perëndimor”, tha Osmani.
Kosova akuzon Serbinë për përfshirje të drejtpërdrejtë në sulmin ndaj Policisë së Kosovës në Banjska, të cilën qeveria në Beograd e mohon. Policia e Kosovës tha se kishte gjetur sasi të mëdha armësh dhe pajisjesh që sugjeronin se kryengritësit kishin planifikuar një operacion më të gjerë. Disa nga automjetet e përdorura kishin shenja të KFOR-it./teve1.info/
