Presidenti i Shteteve të Bashkuara, Donald Trump, i ka thënë privatisht ndihmësve të tij se nuk do t’i japë fund armëpushimit me Iranin nëse Teherani nuk vret trupa amerikane, sipas një raporti të The Wall Street Journal që citon zyrtarë amerikanë.
Sipas raportit, ngurrimi i Trump për të rifilluar konfliktin tregon se ai mund të jetë i gatshëm të “përballojë shpërthime më të vogla për javë të tëra – ose edhe muaj – për të shmangur një konflikt më të gjerë në Lindjen e Mesme”.
Këtë javë, SHBA-të dhe Irani kanë shkëmbyer disa nga përplasjet më të ashpra që nga hyrja në fuqi e armëpushimit në fillim të prillit.
Irani ka lëshuar raketa dhe dronë drejt instalimeve ushtarake amerikane në rajon, si dhe Aeroportit Ndërkombëtar të Kuvajtit, duke shkaktuar një viktimë.
Sekretari i Shtetit i SHBA-së, Marco Rubio, i ka përshkruar këto shkëmbime sulmesh si veprime mbrojtëse dhe jo si kthim në luftë të plotë.
“Ato po ndodhin në përgjigje të një veprimi iranian”, tha Rubio në një seancë dëgjimore në Dhomën e Përfaqësuesve të mërkurën. “Nëse ata nuk qëllojnë drejt këtyre anijeve, ne nuk qëllojmë, por duhet të përgjigjemi.”
Megjithatë, raporti thekson se këto sulme të përsëritura kanë “rritur presionin mbi Trump dhe kanë hedhur dyshime mbi qëndrueshmërinë afatgjatë të armëpushimit”.
Trump ka deklaruar vazhdimisht se është shumë pranë një marrëveshjeje për t’i dhënë fund luftës, e cila do të rihapte Ngushticën e Hormuzit, do të çmontonte programin bërthamor të Iranit dhe do të eliminonte rezervat e uraniumit të pasuruar të vendit.
