Presidenti amerikan Donald Trump ka deklaruar nga Davosi se të gjithë personat e përfshirë në, siç e quajti ai, vjedhjen e zgjedhjeve presidenciale të vitit 2020 në SHBA do të ndiqen penalisht.
Gjatë fjalimit të tij në Forumin Ekonomik Botëror, Trump tha se hetimet për manipulimin e zgjedhjeve janë drejt përfundimit dhe përgjegjësit do të mbahen përgjegjës, shkruan Nova.
“Të gjithë ata që ishin të përfshirë në vjedhjen e zgjedhjeve të vitit 2020, kur fitorja ime u vodh përmes makinave të Dominion, do të mbahen përgjegjës. Hetimi është në fazën përfundimtare”, deklaroi Trump.
Deklarata e tij ka rikthyer debatet për rolin e Serbisë në zgjedhjet amerikane, pasi kompania “Dominion Voting Systems”, e përdorur për numërimin e votave në 2020, ka lidhje operative me Beogradin, ku ndodhet selia e saj evropiane.
Analisti politik serb, Dušan Janjiq, tha se pas fjalimit të Trumpit është e qartë se hetimi për manipulimin e zgjedhjeve përfshin edhe Serbinë.
“Deri më tani ka pasur paralajmërime se një adresë IP nga Serbia është përdorur në një fushatë kundër Trumpit gjatë zgjedhjeve presidenciale amerikane. Këto informacione nuk ishin konfirmuar zyrtarisht, por pas fjalimit të Trumpit në Davos, tani është e qartë se hetimi po zhvillohet dhe përfshin edhe Serbinë”, tha Janjiq për agjencinë Beta.
Ai shtoi se përgjegjësia operative bie mbi Agjencinë e Sigurisë dhe Informacionit të Serbisë (BIA), ndërsa përgjegjësia politike mund të shkojë drejt presidentit Aleksandar Vuçiq.
“Ngrihet pyetja se deri ku do të shkojë hetimi dhe nëse do të përfshijë edhe Vuçiqin, i cili kontrollon gjithçka në Serbi. Kjo do të ishte një situatë jashtëzakonisht e rëndë, sepse do të nënkuptonte se një shtet ka ndërmarrë një operacion kriminal kibernetik kundër një shteti tjetër – në këtë rast, kundër SHBA-së. Se kush do të ndiqet penalisht, do ta vendosë prokurori amerikan”, tha Janjiq.
Edhe komentatori i politikës së jashtme, Boskko Jakshiq, vlerëson se çështja e manipulimit të zgjedhjeve është një nga temat më të ndjeshme në marrëdhëniet mes Uashingtonit dhe Beogradit, duke përfaqësuar pengesën kryesore për një afrim të vërtetë mes dy vendeve.
