Trepça e ka vazhduar dominimin e plotë në garën për Kupën e Kosovës në basketboll.
“Xehetarët” shpërthyen në pjesën e dytë të ndeshjes ndaj Bashkimit, të mërkurën mbrëma në “Mizahir Isma” në Rahovec, për Kupën e pestë rresht.
Trepça e fitoi finalen me rezultatin bindës, 91:72.
Skuadra mitrovicase ka tani nëntë trofe të Kupës. Ndërkohë Bashkimi mbetet me Kupën e vetme të fituar në vitin 2001. Në finale ekipi prizrenas është mposhtur për herë të nëntë. Bashkimi e humbi finalen edhe vjet nga Trepça.
Pjesa e parë e finales në Rahovec ishte e fortë dhe e barabartë. Çereku i parë përfundoi 19:16 për Bashkimin. Çereku i dytë i takoi ekipit mitrovicas me rezultatin 27:22. Kështu skuadrat në pushim shkuan me rezultatin 43:41 në të mirë të Trepçës.
Skuadra e Adis Beqiragiqit shkëlqeu në çerekun e tretë, të cilin e fitoi 22:12. Pas 30 minutave rezultati ishte 65:53. Ndërkohë çereku i katërt ishte thuajse formalitet. “Xehetarët” mbajtën tërë kohën epërsi prej rreth 20 pikëve, për fitore bindëse në fund.
Mustapha Amzil shkëlqeu te Trepça me 22 pikë e 12 kërcime. Akili Vining i realizoi 20 pikë, gjashtë asistime e tri kërcime. Ja’Cori Payne i realizoi 13 pikë e dhjetë asistime. Te Bashkimi lojë pak më të mirë kishte Lejson Zeqiri me 19 pikë. Ike Nwamu i realizoi 16 pikë e shtatë kërcime.
Por Bashkimi u dominua plotësisht në pjesën e dytë dhe ishte larg trofeut. Trajneri i Trepçës, Beqiragiq, e dominoi edhe një finale dhe e fitoi një tjetër trofe. Për Trepçën është trofeu i 20-të në basketbollin kosovar. Skuadra mitrovicase llogaritet favorite e madhe edhe në garën për titull të kampionit.
Palestra në Rahovec ishte e mbushur me shikues. Prezent ishin të dy grupet e tifozëve, ndërsa nuk është regjistruar ndonjë incident.
