Tre persona janë arrestuar në një operacion të zhvilluar nga Policia në Prizren në bashkëpunim me zyrtarë policorë nga Drejtoria e Përgjithshme e Policisë në Prishtinë.
Operacioni është zhvilluar pasi dyshohet se të arrestuarit merreshin me fajde.
Lajmin për teve1.info e ka konfirmuar Shaqir Bytyqi, zëdhënës i Policisë për rajonin e Prizrenit.
Ai ka bërë të ditur se gjatë këtij aksioni është lënduar një vajzë 17-vjeçare dhe një polic, pasi janë goditur me veturë nga njëri prej të arrestuarve i cili ka tentuar të ikë.
“Gjatë tentimit për arrestimin e njërit prej të dyshuarve, i dyshuari nuk është ndalur me automjet dhe ka vazhduar ikjen. Gjatë ikjes, i njëjti ka goditur një këmbësore, femër, 17-vjeçare, e cila, sipas vlerësimit të mjekëve, ka pësuar lëndime dhe është jashtë rrezikut për jetë. Po gjatë ikjes, i dyshuari ka goditur edhe një zyrtar policor – hetues nga Drejtoria e Përgjithshme e Policisë në Prishtinë, i cili ka pësuar lëndime të lehta trupore. Pas veprimeve të ndërmarra nga zyrtarët policorë, i njëjti është ndaluar dhe arrestuar”, ka njoftuar Bytyqi.
Ai ka njoftuar se të arrestuarit kryesor i janë gjetur para të dyshuara se janë dhënë për qëllime të simulimit, të cilat janë sekuestruar për procedurë të mëtejshme hetimore.
Bytyqi ka thënë se në bashkëpunim dhe koordinim me Prokurorin e Shtetit, është duke ndërmarrë veprime të tjera hetimore lidhur me rastin, me qëllim të dokumentimit të plotë të veprës penale dhe rrethanave të tjera ndërlidhëse.
Ai ka bërë të ditur se ky operacion është realizuar edhe falë besimit dhe bashkëpunimit të qytetarëve me Policinë e Kosovës./teve1.info/
