Njësia e Trafikut Rajonal e Drejtorisë Rajonale të Policisë në Mitrovicën e Jugut ka gjobitur tre shoferë që po drejtonin automjetet me shpejtësi të rrezikshme mbi 150 km/h, në një zonë ku kufizimi i shpejtësisë është 80 km/h.
Sipas njoftimit zyrtar, iIncidenti u regjistrua gjatë kontrolleve të trafikut në rrugën nacionale Mitrovicë–Prishtinë, pranë fshatit Maxhunaj, ku policia përdori pajisje inteligjente për matjen e shpejtësisë.
Ndaj kundërvajtësve u shqiptuan gjoba prej 300 eurosh secilit, tre pikë negative në patentë dhe masa mbrojtëse ndalimi i drejtimit të mjetit për tre muaj në territorin e Republikës së Kosovës.
“Policia apelon tek të gjithë drejtuesit e automjeteve që ti përmbahen kufizimeve të shpejtësisë dhe rregullave të trafikut rrugor”, theksohet në njoftim.
