Protesta e transportuesve publikë dhe privatë në Komunën e Prishtinës, po vazhdon edhe sot.
Ndryshe nga dita e hënë, kur pas pezullimit të të gjitha linjave punëtorët protestuan para objektit të Komunës dhe ndërtesës së Qeverisë, sot protestuesit kanë zgjedhur një formë tjetër shprehjeje pakënaqësie.
Autobusët e “Trafikut Urban” dhe linjave private kanë defiluar nëpër rrugët kryesore të kryeqytetit për të tërhequr vëmendjen e qytetarëve dhe institucioneve.
Pas përfundimit të defilimit, autobusët janë vendosur pranë objektit të Komunës së Prishtinës, ku protesta do të vazhdojë.
Sindikata e “Trafikut Urban” ka deklaruar se që dy muaj punëtorët e kësaj ndërmarrjeje nuk kanë marrë paga, ndërsa borxhi i tyre ndaj furnitorëve ka kaluar mbi 1.6 milionë euro. /teve1.info/
