Ylli i Kosovës, Edon Zhegrova ishte pjesë e Lillet për ndeshjes ndaj Monacos, por sulmuesi i krahut nuk u aktivizua.
Zhegrova qëndroi në bankën rezervë dhe u rikthye pas një kohe të gjatë në formacionin e Lillet, ekip që triumfoi 1:0 ndaj Monacos, të dielën mbrëma.
Pas ndeshjes, trajneri i Lillet, Bruno Genesio ka folur edhe për Zhegrovën, duke prekur të ardhmen e tij dhe duke treguar se për çfarë arsye nuk e aktivizoi ndaj Monacos.
“Edoni është këtu, por do të shohim nëse do të jetë këtu deri në fund. Edonit i duhet kohë, pasi nuk ka luajtur për një kohë shumë të gjatë. Krahas kësaj, ai kishte një lodhje të muskujve dhe për këtë arsye nuk mora asnjë rrezik për ta inkuadruar”, ka thënë Genesio.
E ardhmja e Zhegrovës tek Lille nuk është aspak e sigurtë pasi 26-vjeçari pritet të largohet nga ekipi francez deri në fund të këtij muaji.
Ai ka kontratë me Lillen deri në vitin 2026, ndërsa ka marrëveshje personale me Juventusin, ekip që I ka ofruar pagë vjetore prej 2.5 milionë eurosh dhe kontratë deri në vitin 2030.
