Shkruan: Arben Fetoshi
Në Ohër apo diku tjetër, s’ka rëndësi. Plani europian (miratuar edhe nga SHBA) ka për qëllim ta fusë procesin në binarë. Mirëpo, zbatimi i tij do të jetë sfida përcaktuese. Nuk thonë kot “zullumi këputet prej s‘trashi”. Si politikan dinak, Vuçiq mund të befasojë sërish. Pajtohet, për t’i shmangur pasojat, por më pas bishtëron, për ta zgjatur status quo-në. Dhe nëse Perëndimi e toleron, pse jo?! Zvarritja i konvenon Serbisë, i konvenon edhe Putinit.
Por, çka pas marrëveshjes “historike”? (Nuk ka popull në botë që ka përjetuar më shumë ditë e ngjarje historike se sa shqiptarët).
Edhe pse plani është formuluar sipas parimit “askush fitues, askush humbës”, efektet e tij s’mund të jenë neutrale. Këtë e dinë si Vuçiq ashtu edhe Kurti. Nëse për hir të njohjes Serbia fiton “hise” në Kosovë përmes asociacionit, peshorja anon në favor të saj. E nëse për hir të mosnjohjes Kosova fiton më shumë subjektivitet ndërkombëtar, peshorja nuk anon duke i favorizuar të dyja. Në këtë rast, mosnjohja nga Serbia do të ishte “mirëkuptim pragmatik” që kompensohet me njohjen e Pesëshes së BE-së (shtetet mosnjohëse) dhe rrugën e integrimit euro-atlantik. Pra, trajektoren e përcaktojnë dy faktorë: – vendosmëria e Perëndimit për të mos e toleruar më tutje një Rusi të vogël në Ballkan, dhe – aftësia e Kosovës për ta penguar rrezikun e kamufluar të asociacionit. Me një Serbi të denacifikuar (pranimi i krimeve mbi shqiptarët) e demokratike, “vetë-menaxhimi” i serbëve s’do të duhej të ishte problem. Por Vuçiq nuk është Adenaueri që po vjen në Prishtinë për paqen (Paris, 1963). Në Ohër ai shkon si xhelat me petk demokrati, e kjo është problem.
Sidoqoftë, Kosova duhet ta pranojë marrëveshjen dhe Kurti mirë që e ka pranuar. S’ka kapacitete për të kundërtën, sepse s’ka arritur të imponohet. Kështu që, në linjë me botën demokratike, ajo duhet të luftojë për të drejtën e saj me përunjësi. Të koordinohet me Amerikën e BE-në, për ta siguruar vetveten dhe për të mos i lejuar befasitë e Vuçiqit.
Një vetë-menaxhim territorial për serbët sot, do të thotë një “republikë serbe” nesër.
Një marrëveshje me Serbinë sot pa zhbllokimin ndërkombëtar të Kosovës, do të thotë zgjatim i interesave ruse nesër.
Prandaj, beteja me Putinin fitohet në Kosovë.
Prandaj, Amerika dhe BE-ja mund ta mposhtin Putinin, nesër, në Ohër.
Opinioni përmban pikëpamjet e autorit dhe nuk prezanton qëndrimet editoriale të teve1.info
