Pushimet në bregdetin shqiptar për pesë të rijnë nga Kosova u kthyen në tragjedi të mërkurën.
E gjithë ngjarja, ndodhi tek vendi i njohur si “Rana e Hedhun” në Shëngjin.
Këtu, pesë të rinjtë kosovarë, u futën në det për t’u larë, por që më pas dyshohet se u përfshinë nga rrymat e forta.
E si pasojë e kësaj, dy prej tyre, njëri nga Drenasi e tjetri nga Fushë Kosova, u mbytën në det.
Detaje se si ndodhi i gjithë rasti, kanë dhënë nga Policia e Lezhës.
“Menjëherë pas marrjes së njoftimit, në adresën e dhënë kanë shkuar shërbimet e Policisë Kufitare, shërbimet e Drejtorisë Vendore të Policisë Lezhë, si dhe ato të emergjencës.Falë reagimit të menjëhershëm të qytetarëve me Jet Ski, në bashkëpunim me shërbimet e Policisë, u bë e mundur nxjerrja nga deti e 5 shtetasve nga Kosova, të cilët u transportuan me urgjencë në Spitalin Rajonal Lezhë për marrjen e ndihmës mjekësore. Sipas informacionit paraprak nga Urgjenca e Spitalit Rajonal Lezhë, 2 prej shtetasve kanë humbur jetën, ndërsa 3 shtetasit e tjerë po marrin ndihmë mjekësore”, njoftoi Policia e Lezhës.
Gjithë ngjarjen nga afër, e ndoqi gazetari shqiptar, Martin Marku.
Ky i fundit për Tëvë1, dha detaje për gjendjen shëndetësore të tre të mbijetuarve nga ky rast.
Marku, thotë se në momentin kur ndodhur e gjithë ngjarja siguria në këtë plazh ishte e ulët.
“Pavarësisht që është hapur sezoni ende nuk janë vendosur as kullat e vrojtimit e as rojet bregdetare e as shenjat sinjalizuese që tregojnë për një mot të paqëndrueshëm apo një mot i agravuar”, tha ai.
Siguria bregdetin shqiptar, po vlerësohet e ulët edhe nga kryetari i Shoqatës së kërkim Shpëtimit, Mentor Maloku.
“Fatkeqësisht Shqipëria është shumë larg sigurisë në plazhe, për shkak që vrojtuesit apo shpëtimtarët nuk janë aq sa duhet në Shqipëri. Përpos ato resorte private të cilat i kanë. Tek tani ka filluar të vetëdijesohet dhe është formuar Shoqata e Shpëtimtarëve cila është shumë e nevojshme, jo vetëm në një pjesë por në gjithë bregdetin deri në Sarandë atje duhet të ketë shpëtimtar”, u shpreh ai.
Zhytësi kosovar, ka një këshillë për gjithë ata që pushimet vendosin t’i kalojnë në Shqipëri.
“Te kenë parasysh kushtet atmosferike, të kenë parasysh edhe ata pak shpëtimtar që janë le të vlejnë flamujt. Kur është flamuri i kuq assesi mos të hyjnë pasi është në të mirën e tyre”, tha Maloku.
Pas këtij rasti, presidentit i Shqipërisë, Bajram Begaj, ka bërë ftesë që të merren të gjitha masat e nevojshme për të garantuar sigurinë në plazhe gjatë gjithë sezonit veror.
