Në Gjykatën Themelore të Ferizajt janë paraqitur sot në seancën fillestare ish-zyrtari policor, Festim Ramadani dhe Jeton Misinit, të dyshuar për vrasje të rëndë që ndodhi më 16 gusht 2024, në Ferizaj.
Festim Ramadani dyshohet se me dashje dhe me qëllim të hakmarrjes lidhur me disa dyshime brenda familjes, e ka qëlluar me breshëri plumbash viktimën, duke e lënë të vdekur në vend, në një ambient ku po mbahej dasmë.
E për këtë rast tashmë është caktuar seanca fillestare ndaj të akuzuarve, e cila ka filluar sot.
Ekipi i Tëvë1 nga atje ka bërë të ditur se avokatët e të akuzuarve kanë kërkuar të shtyjnë seancën.
Mirëpo i akuzuari kryesor, Festim Ramadani është shprehur kundër. Ai ka kërkuar që seanca të vazhdojë.
Sipas dosjes së aktakuzës, thuhet se ekziston dyshimi i bazuar se i pandehuri Festim Ramadani, më 16 gusht 2024, rreth orës 19:21, në parkingun e restorantit “Fron Palace”, në fshatin Bibaj të komunës së Ferizajt, gjatë një ceremonie martesore, “me dashje dhe paramendim, me qëllim hakmarrjeje për motive të pretenduara familjare të pabazuara dhe të pakonfirmuara juridikisht, në prani të dhjetëra personave, përfshirë të mitur, me armë zyrtare automatike të policisë, me dashje dhe qëllim të privimit nga jeta, me breshëri plumba shtien në drejtim të viktimës S.S., duke e privuar nga jeta”.
Madje, thuhet se si pasojë e të shtënave është rrezikuar seriozisht edhe siguria e personave tjerë të pranishëm në atë moment.
Kështu, Festim Ramadani thuhet se kreu veprën penale të “Vrasjes së rëndë”.
Kurse Jeton Misini akuzohet se me dashje e ka ndihmuar policin në privimin nga jeta të viktimës S.S., ashtu që i pajisur me mjet të forta, ka mbrojtur perimetrin e sulmit dhe ka parandaluar çdo ndërhyrje, në mënyrë që Ramadani të realizonte pa pengesë veprën penale të vrasjes së rëndë.
