Një rast i raportuar fillimisht si sulm ndaj një të miture në Leposaviq ka rezultuar të jetë deklarim i rremë, pas verifikimeve të kryera nga Policia e Kosovës.
Sipas raportit policor, ngjarja ka ndodhur më 11 prill 2026, rreth orës 00:30, kur një shtetase e Serbisë është paraqitur në stacionin policor së bashku me vajzën e saj të mitur, duke pretenduar se ajo ishte sulmuar nga një mashkull.
Pas ndërmarrjes së veprimeve hetimore dhe analizimit të pamjeve nga kamerat e sigurisë, policia ka konstatuar se deklarata nuk ishte e vërtetë. Sipas gjetjeve, vajza e mitur ishte ajo që kishte sulmuar personin në fjalë.
Në konsultim me prokurorin, është iniciuar rasti për deklarim të rremë, ndërsa palët janë liruar në procedurë të rregullt.
