Kryetari i Prishtinas, Përparim Rama, ka konfirmuar se do të marrë pjesë në protestën që do të mbahet në Ditën e Pavarësisë, duke theksuar se kjo çështje është mbi ndarjet partiake.
Në një konferencë për media, ai u shpreh se vlerat e Ushtria Çlirimtare e Kosovës i ka mbështetur gjithmonë dhe do të vazhdojë t’i mbështesë si kryetar i kryeqytetit dhe si institucion
Sipas tij, këto vlera duhet të çmohen dhe të ngriten mbi interesat politike, pasi përbëjnë një çështje kombëtare.
Rama bëri të ditur gjithashtu se në ditën e protestës transporti urban do të jetë pa pagesë për të gjithë qytetarët, me qëllim që të lehtësohet pjesëmarrja.
I pyetur rreth emërimit të drejtorëve të drejtorive komunale dhe nëse po pritet zyrtarizimi i një koalicioni, ai tha se qeverisja në kryeqytet është funksionale. Sipas tij, nënkryetarët dhe drejtorët janë në detyrë dhe puna po vazhdon normalisht.
Rama shtoi se ka ftuar të gjitha partitë politike për një koalicion të gjerë, me qëllim avancimin e proceseve në kryeqytet, duke theksuar se një bashkëpunim i tillë pritet të realizohet së shpejti.
“Po ju e dini që ne, ne e kemi qeverisjen e kemi funksionale. Domethënë i kemi nënkryetarët, drejtorët, jemi duke punuar në kryeqytet pa asnjë problem. Unë kam kërkuar publikisht nga të gjitha partitë politike që të bashkohen, pra të bëjmë një koalicion të gjerë, që t’i shtyjmë proceset përpara për kryeqytet, ashtu siç edhe e meritojnë qytetarët e kryeqytetit. Dhe kjo me siguri që do të bëhet shumë shpejt. Por, po them që kryeqyteti punon në mënyrën më të mirë të mundshme, i ka të gjithë drejtorët edhe nënkryetarët tash në vend, edhe jemi duke vazhduar me punë si çdo herë”, shtoi kryetari.
