Departamenti amerikan i Thesarit tha më 26 janar se sanksionet e reja shënjestrojnë gjashtë individë dhe 12 entitete, përfshirë edhe një kompani të imazheve satelitore nga Kina dhe kompani dhe persona në Republikën Qendrore Afrikane, ku Wagner ka mercenarë aktivë, por edhe në Emiratet e Bashkuara Arabe.
Në njoftimin e Thesarit tha se sanksionet janë pjesë e përpjekjeve për të “degraduar aftësinë e Rusisë në luftën kundër Ukrainës”.
Mijëra trupa të Wagner-it po luftojnë në Ukrainë dhe themeluesi i këtij grupi, Yevgeny Prigozhin, publikisht ka tentuar që të marrë meritat për përparimet në fushëbetejë. Ai po ashtu është parë në video duke rekrutuar luftëtarë për Wagner-in në burgjet ruse, duke u premtuar të burgosurve falje nëse marrin pjesë në luftime.
Zyrtarët ukrainas dhe perëndimorë kanë fajësuar trupat e Wagner-it për mizoritë kundër civilëve në Ukrainë, teksa pushtimi rus i Ukrainës tani ka hyrë në muajin e 12-të.
“Teksa sanksionet ndaj Rusisë nga koalicioni ynë ndërkombëtar vazhdojnë të japin rezultate, Kremlini është i dëshpëruar duke kërkuar për armë dhe mbështetje – përfshirë edhe përmes Grupit brutal Wagner – për të vazhduar luftën e tij të pajustifikuar kundër Ukrainës”, citohet të ketë thënë sekretarja amerikane e Thesarit, Janet Yellen.
Thesari tha se personeli i Wagner-it “po përfshihet në aktivitete serioze kriminale, përfshirë ekzekutimet masive, përdhunime, rrëmbime fëmijësh dhe abuzime fizike në Republikën e Afrikës Qendrore dhe Mali”.
SHBA-ja tha se që nga vitit 2017, Wagner ka qenë i përfshirë në aktivitete që kanë kërcënuar Ukrainën.
“Në kohën kur ushtria ruse ka pasur ngecje në fushëbetejë, [presidenti rus, Vladimir] Putin po varet te Wagner-i për të vazhduar luftën e tij”, tha SHBA-ja.
Në listën e sanksioneve janë përfshirë edhe disa kompani. /REL/
