Sulmuesi shqiptar Jasir Asani ka pak ditë që është kthyer në Maqedoninë e Veriut, për shkak të situatës kaotike në Iran, teksa është pjesë e skuadrës së Esteghlal FC. 30-vjeçari është prononcuar për kanalin e “FSHF”-së, ndërsa kryefjalë ishte ndeshja e shumëpritur Poloni – Shqipëri, e cila do të mbahet në 26 mars, Varshavë.
Jeni rikthyer në shtëpi. Si po ndiheni këto ditë? A keni planifikuar stërvitje dhe keni folur me stafin e Kombëtares?
Të them të drejtën mirë. Kam biseduar me stafin dhe jam stërvitur në Maqedoni. Do kthehem në Shqipëri dhe do nis stërvitje me Partizanin.
Pak ditë jemi larg nga ndeshja me Poloninë. Si ndiheni tani dhe si është atmosfera para kësaj ndeshje?
Është atmosferë pozitive sepse mezi po e presim këtë ndeshje. E dimë që stadiumi do të jetë plot dhe anë e mbanë botës, shqiptarë do ta ndjekin nga TV apo stadiumi ndeshjen më të rëndësishme që e kemi pritur. Kemi shanse për t’ia dalë.
Ke shënuar një nga golat më spektakolarë kundër Polonisë. Si e kujton atë moment dhe çfarë emocionesh të sjell kur e kujton?
Normalisht emocion ka çdo ndeshje kur shënon ndaj një ekipi si Polonia, nuk e harron asnjëherë. Kur e kam shënuar atë gol ka qenë momenti për Europian dhe kanë qenë emocionet më të mëdha që kam përjetuar për Kombëtaren shqiptare. Tani është një ndeshje tjetër dhe do të bëj maksimumin dhe shpresoj që të shënoj edhe një tjetër gol ashtu si në Europian.
Polonia ka lojtarë që luajnë në kampionate të forta europiane. Si e vlerëson Poloninë si kundërshtar?
Normalisht, Polonia ka lojtarë shumë të mirë por s’duhet të harrojmë që edhe ne kemi lojtarë që luajnë në kampionate shumë të mira.
Shpresoj të mos kemi dëmtime dhe të jemi 100%. Shkojmë për të fituar dhe me ndihmën e të gjithëve mund t’ia dalim. Nuk është asgjë e vështirë. Në shtëpi e kemi mundur Poloninë. Duhet të shkojmë atje me fokus 100% në ndeshje dhe të shohim si shkon.
Luhet në Varshavë me tifozë polakë. Si mendon se përjetohet atmosfera?
Është ndeshje e vështirë. Por kemi luajtur atje ku kemi humbur dhe kemi pasur shanset tona për ta fituar. Futbolli kështu e ka, humbëm me një rast të Polonisë. Do të bëjmë ndeshje shumë të mirë dhe të gëzojmë tifozët tonë që do të jenë atje shumë mirë.
Finalja ndaj Ukrainë – Suedi. Ke ndonjë preference ose si i vlerëson?
Çdo kombëtare është e fortë si Ukraina ashtu edhe Suedia. Duhet të hyjmë fillimisht 100% te Polonia. E para është shumë më e vështirë sepse nëse e kalon këtë, ke të dytën që mund ta analizosh de përgjigjesh. Nuk kam preferencë sepse të dyja kanë lojtarë shumë të mirë. Cilado të jetë, rëndësi ka të kalojmë të parën. Shpresoj që ëndrrën ta bëjmë realitet.
Sa beson se mund të arrijmë Botërorin?
Kemi luajtur kundër Suedisë dhe Polonisë dhe kemi shumë besim që të hyjmë të japim 100% dhe të kalojmë në raundin tjetër.
