Të gjitha ndeshjet e turneut “Final 8” të Kupës së Kosovës në basketboll, do të zhvillohen me praninë e tifozëve në tribuna. Kështu, ka bërë të ditur sekretarja e përgjithshme e FBK-së, Elvira Dushku në konferencën e mbajtur të premten në Gjakovë. Turneu “Final 8” do të zhvillohet në palestrën “Shani Nushi” në Gjakovë prej datës 13 deri më 17 shkurt, kur do të mbahen ndeshjet finale në të dyja konkurrencat.
“Sa i përket tifozëve unë dua ta jap një informatë që ka të bëjë me organizimin e tyre. Ekipet kundërshtare do t’i kenë tifozët e tyre të pranishëm në palestra të ndarë në dy tribuna anash. Ne jemi duke bërë përpjekje maksimale së bashku me Komunën e Gjakovës, KB Vëllaznimin, Policinë e Kosovës dhe të gjitha organet tjera që janë të përfshira në çështjet e sigurisë që sa i përket sigurisë për këto ditë të jetë në nivelin më të lartë të mundshëm dhe të mos kemi asnjë incident të mundshëm”, tha Dushku.
Në këtë konferencë ishte i pranishëm edhe anëtari i Bordit të KB Vëllaznimit, Jeton Bakalli. Turneu i Kupës së Kosovës do të organizohet nga skuadra gjakovare në bashkëpunim me FBK-në. Bakalli ka thënë se pret që organizimi të jetë në nivelin më të lartë të mundshëm, ndërsa sa i përket çmimit të biletave, ka thënë se gjithçka do të bëhet publike javën tjetër.
“Është një ngjarje e cila na ka motivuar si kryesi e klubit edhe në bazë të përvojës që kemi pasur me organizimin e ndeshjeve ku në asnjë ndeshje nuk kemi pasur asnjë incident më të voglin dhe ajo ka qenë arsyeja që ne sot këtu ta marrim përsipër organizimin e Final 8”, theksoi Bakalli.
Kupa e Kosovës është njëri prej trofeve më të rëndësishëm në basketbollin kosovar kurse në turneun “Final 8” do të paraqiten Trepça, Sigal Prishtina, Peja, Ylli, Bashkimi, Vëllaznimi, Prizreni dhe Istogu. Në konkurrencën e meshkujve, garat do të nisin me ndeshjet çerekfinale për trofeun e Kupës, ndërsa tek femrat do të luhet vetëm finalja, ku do të përballen Bashkimi dhe Prishtina.
