Eliminimin nga Kupa e Kosovës, tifozët e Pejës në basketboll nuk e kanë pritur mirë.
Peja të enjten u eliminua nga gara për trofeun e çmuar, pas humbjes së dytë nga bashkimi, në çerekfinale. Më 8 janar skuadra e verdhë pësoi 96:90 në Prizren në çerekfinalen e parë. Dhe të enjten e humbi çerekfinalen e dytë nga prizrenasit me shifrat 73:70.
Tifozët pejanë të pakënaqur me udhëheqësinë e klubit dhe rezultatet në parket, ndërprenë ndeshjen pak para fundit, duke hedhur mjete tymosëse në parket. Ata më pas akuzuan kryesinë e klubit për gjendjen e krijuar, jo lojtarët.
“Po përsëritet e njëjta histori që po ndodh tash e sa vjet. Nuk është problem humbja. Problemi është kryesia që po e mbyt klubin ngadalë. Ne e dimë mirë kush po e shkatërron këtë klub. Jo lojtarët. Jo fanella. Por ata që rrinë në zyra e nuk e dinë çka është Peja. KB Peja nuk është biznes i juaji, nuk është CV, nuk është reklamë. Ky klub është i qytetit”, ka shkruar tifo-grupi UCF ndër të tjera pas ndeshjes me Bashkimin.
Peja po ka probleme edhe në kampionat dhe nuk di për fitore në katër ndeshjet e fundit. Skuadra fitoren e fundit e realizoi ndaj Prishtinës më 17 dhjetor të vitit të kaluar.
Pas humbjes së thellë në Mitrovicë, trajneri amerikan Greg Gibson u largua me marrëveshje të dyanshme.
Kroati Damir Milaçiq mori drejtimin e skuadrës më 17 janar, por nisi me dy humbje.
Se Peja nuk është në gjendjen më të mirë u bë e qartë kur hoqi dorë nga ndeshja në ligën ndërkombëtare, ENBL. Skuadra nuk udhëtoi për në duke dëshmuar që drejtuesit e klubit nuk i kishin bërë planet si duhet.
Të martën, Peja luajti në Greqi ndaj Iraklisit dhe humbi shumë thellë, 122:80, po në kuadër të ENBL-së. Dhe vetëm dy ditë më pas pësoi humbje të ngushtë por shumë të rëndë.
Në Superligë, Peja është e treta me 24 pikë, sa i ka edhe Bora në vendin e katërt. Trepça është e para me 29 pikë, kurse Bashkimi i ka 27 në të dytën.
