Specialja i vazhdon thirrjet në Kosovë, për cilësinë e të cilave shpeshherë nuk bëhet e ditur. Si të papranueshme, konsiderohen dëshmitë e atyre që më parë, kanë qenë edhe vet të dyshuar nga organet e Speciales.
Përmes një postimi në facebook, njoftoi opinionin se u ftua nga Dhomat e Specializuara të Kosovës.
Por ish pjesëtari i Ushtrisë Çlirimtare të Kosovës, Shukri Buja, nuk tregoi se në çfarë cilësie është kontaktuar nga Specialja.
Këto thirrje të Dhomave të Specializuara, konsiderohen se janë në cilësinë e dëshmitarit.
“Ftesat të cilat vijnë nga Dhomat e Specializuara janë kryesisht për dëshmitarët të cilët ftohen që të dëshmojnë në proceset aktive pranë kësaj Gjykate. Natyrisht që i njëjti është ftuar që të jap dëshminë në rastin kundër Thaçit dhe të tjerëve, pasi që në rast se do të ishte i dyshuar ai do të kishte pranuar ftesë nga Zyra e Prokurorit të Specializuar”, ka thënë Amer Alija nga Fondi për të Drejtën Humanitare.
Shukri Buja ishte paraqitur edhe në vitin 2019 në Hagë, siç thoshte ai në cilësinë e të dyshuarit.
Thirrjet, njëherë si i dyshuar e më pas si dëshmitar, sipas avokatit Kadri Osaj nuk janë në përputhje me ligjin.
“Në qoftë se dikush është marrë edhe në cilësinë e të dyshuarit, edhe në cilësinë e dëshmitarit , atëherë kjo provë është e papranueshme. Pse është e papranueshme, ngase i dyshuari ka disa të drejta dhe obligime që nuk i ka dëshmitari. I dyshuari mundet me u mbrojtë edhe në heshtje, ndërsa dëshmitari e ka obligim me thanë të vërtetën, e në rast se e inkriminon vetveten mundet edhe ai me heshtë. Kështu që, këta janë marrë në mënyrë të kundërligjshme, pasi nuk është definuar pozicioni i tyre”, vlerëson Osaj.
Televizioni ka tentuar të marrë një përgjigje nga Specalja, se në çfarë cilësie është ftuar Buja, por deri në momentin e publikimit të kronikës nuk ka marrë përgjigje.
Ndërkohë, në fazë të dëgjimit të dëshmitarëve, aktualisht është vetëm rasti i katërshes së UÇK-së.
