Thirrje antishqiptare janë dëgjuar të dielën në ndeshjen basketbolli mes Maqedonisë së Veriut dhe Rumanisë në Kumanovë.
Prezent në këtë ndeshje ishin edhe përfaqësues të lartë shtetëror, përfshirë kryeministrin maqedonas Hristjan Mickoski.
Në prani të tij, u dëgjuan thirrjet “shqiptar i mirë është shqiptar i vdekur”, “dhoma gazi për shqiptarët”, “Maqedoni e pastër”.
Këto thirrje, sipas Mickoskit, që lëshoi një reagim gjatë ditës, u bënë nga një grup i vogël njerëzish.
“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë – së pari për atë që ndodhi gjatë ndeshjes së basketbollit ndërmjet Maqedonisë [së Veriut] dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë”, është shprehur Mickoski.
Reagim kundër këtyre thirrjeve, erdhi edhe nga presidentja e Republikës së Kosovës, Vjosa Osmani, e cila e ka konsideruar veprimin si të papranueshëm.
“Thirrjet antishqiptare të dëgjuara gjatë ndeshjes në Kumanovë janë të papranueshme dhe cenojnë frymën e bashkëjetesës dhe respektit të ndërsjellë, që duhet të jenë themel i çdo shoqërie demokratike me aspirata evropiane. Shqiptarët janë popull autokton në trojet e tyre si dhe meritojnë të trajtohen me dinjitet dhe barazi, ashtu si çdo komunitet tjetër”, ka reguar Osmani.
Reagim për atë që ndodhi në palestër, pati edhe nga partitë shqiptare në Maqedoni të Veriut.
BDI kërkoi dorëheqjen e dy zëvendësministrave të VLEN-it, ndërkaq kryetari i Aleancës për Shqiptarët, Arben Taravari, kërkoi reagim të krerëve të shtetit, pasi thirrjet nacionaliste u bënë në prani të tyre.
E sipas njohësit të çështjeve politike në Maqedoni të Veriut, Xhelal Neziri, ngushtimi i rrethit të Vuçiqit, do të tentoj ta destabilizoj rajonin.
“ Rritja e këtij ndikimi dhe perceptimi për Maqedonin e veriut si pjesë e botës integraliste serbe, ose Serbisë integraliste, mendoj se do të prodhoj incidente të këtilla edhe në të ardhmen për arsyeje se ju e dini që regjimi i Vuciqit në Beograd është i rrezikuar ka parashikime se deri në fund të vitit, ai ose të shpall zgjedhje të parakohshme ku do t’i humb në bazë të gjitha anketave”, ka thënë Neziri.
Ndërkaq, profesori Dorajet Imeri, thontë se partitë maqedonase mund t’i përdorim këto grupe edhe para zgjedhjeve lokale atje.
“ Zgjedhjet lokale shfrytëzohen si një moment për të ndezur elektoratin nacionalist maqedon. Në ndërkohë vendi ku u bë kjo thirrje ishte në prani të kryeministri aktual të Maqedonisë i cili sapo bëri një deklaratë duke dënuar këtë gjuhë, por kjo nuk mjafton”, është shprehur Imeri.
Thirrjet antishqiptare ka nisur t’i hetoj Prokuroria Themelore Publike në Kumanovë, për të parë nëse ka elemente që ndërlidhen me veprën penale të gjuhës së urrejtjes.
