Prokuroria Themelore Publike në Kumanovë ka nisur hetime për një vepër të mundshme penale që lidhet me gjuhën e urrejtjes, pas thirrjeve antishqiptare të dëgjuara gjatë ndeshjes së basketbollit mes Maqedonisë së Veriut dhe Rumanisë, të zhvilluar më 2 gusht në Kumanovë.
Gjatë kësaj ndeshjeje, ku ishin të pranishëm edhe zyrtarë të lartë të Qeverisë maqedonase, janë dëgjuar parulla fyese si “shqiptar i mirë është shqiptar i vdekur”, “dhoma gazi për shqiptarët” dhe “Maqedoni e pastër”.
Kryeministri i Maqedonisë së Veriut, Hristijan Mickoski, i cili ishte në sallë gjatë ndeshjes, i dënoi thirrjet duke thënë:
“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë – së pari për atë që ndodhi gjatë ndeshjes së basketbollit ndërmjet Maqedonisë dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive”.
Ai gjithashtu tha se nuk i kishte vërejtur thirrjet në momentin kur ndodhën, duke shtuar se ato ishin bërë nga një grup i vogël njerëzish. Ngjarja ka nxitur reagime të ashpra në Maqedoninë e Veriut, si dhe në Kosovë dhe Shqipëri.
