Shkencëtarët kanë zhvilluar një test gjaku që identifikon personat më të rrezikuar nga kardiomiopatia hipertrofike (HCM), sëmundja më e zakonshme e trashëguar e zemrës, e cila prek miliona njerëz në botë.
HCM shkakton trashje të murit të zemrës dhe mund të çojë në dështim të zemrës ose ritme të çrregullta që rrezikojnë jetën, shkruan Guardian.
Problemi është se nuk ka shërim dhe nuk dihet se cilët pacientë janë më të rrezikuar.
Në një studim të kryer nga universitete si Harvard dhe Oxford, u mat niveli i proteinës peptidi natriuretik i tipit B, N-terminal (NT-Pro-BNP) në 700 pacientë me HCM.
Nivelet e larta treguan punë të shtuar të zemrës, plagë në muskul dhe rrezik për komplikime si fibrilacion atrial ose dështim i zemrës.
Testi i gjakut mund t’i lejojë mjekët të monitorojnë më mirë pacientët më të rrezikuar dhe të ofrojnë trajtime që mund të shpëtojnë jetën, ndërsa ata me rrezik të ulët mund të shmangin trajtimet e panevojshme.
Pacientët dhe familjet e tyre do të përfitonin nga kjo qasje, duke ulur pasigurinë dhe duke ofruar mundësinë për të planifikuar më mirë jetën dhe kujdesin shëndetësor.
Carolyn Ho nga Shkolla e Mjekësisë Harvard, theksoi se testi mund të ndihmojë në “targetimin e terapive të duhura për pacientët e duhur në kohën e duhur”, ndërsa Bryan Williams nga Fondacioni Britanik i Zemrës shtoi se kjo metodë mund të sjellë përfitime për pacientët globalisht dhe të ofrojë njohuri të reja mbi zhvillimin e zemrës në HCM.
