Pas sulmit terrorist në Banjskë të Zveçanit, Policia e Kosovës u hodh në aksion.
Kjo gjeti prova të mjaftueshme, se kush e sulmoi Policinë e Kosovës me 23 shtator të vitit 2023.
Ndër to ishte edhe ky letërnjoftim i Vladimir Vuçetiq.
Ky i fundit përveç pjesëmarrjes në këtë sulm, doli të jetë edhe pjesëtar i organizatave terroriste “Mbrojtja Civile” dhe “Brigada e Veriut”.
E dy vjet më vonë, Vuçetiq me shokë u shfaq sërish.
Por këtë herë duke e ruajtur presidencën serbe, kundër protestave të studentëve.
Se bëhet fjalë për të njëjtin person që është pjesë e aktakuzës se “Banjskës” e thonë edhe nga Prokuroria Speciale e Republikës së Kosovës.
Por, këta shtojnë se në grupin me këmisha jeshile në Beograd, u panë edhe pjesëtarë të tjerë të grupit terrorist të Banjskës.
“Mund të konfirmojmë, se disa persona ashtu siç kanë raportuar mediet vendore dhe ndërkombëtare janë pjesë e aktakuzës e ngritur nga Prokuroria Speciale, në rastin konkret”, ka thënë zëdhënësja e PSRK, Arbnora Luta.
Por, pse Vuçiq ka angazhuar këto grupe për ta mbrojtur kundër studentëve?
“Sot nuk është çudi që në mesin e njerëzve që mbrojnë Vuçiqin nga studentët, janë nga ai nivel, sepse Vuçiq duket se heziton ta lë vetën në një mbrojtje totale të policisë, prandaj ka angazhuar edhe dirigjuar njerëz të tillë, që siç thuhet kanë veshur edhe uniformën zyrtare që të duken para opinionit së janë pjesëtar të sigurisë, por që në fakt vijnë nga niveli kriminal. Kushdo që thotë se “Banjska” është bërë pa dijeninë e Vuçiq, është naiv”, ka thënë Shaip Kamberi.
E njohësit e ligjit në Kosovë, thonë se presioni ndërkombëtar, është e vetmja mundësi që këta persona të përballën me drejtësinë.
“Vendosja e tyre para drejtësisë, mund të bëhet vetëm me një presion dhe trysni të faktorit ndërkombëtar në drejtim të institucioneve të Serbisë, gjë që kohët e fundit nuk kemi parë, por kemi pasur kërkesa, e fundit ishte e përfaqësuesit të NATO-së, ku i bën thirrje Serbisë që t’i mbaj përgjegjës personat në fjalë për ngjarjet e Banjskës, për çka unë jam pesimist nëse do të vendoset drejtësia nëse të njëjtit do të ballafaqohen me procedura në kuadër të shtetit serb”, ka thënë avokati Ardian Bajraktari.
Ndryshe, krah presidentit serb në “Parkun e Pionerit” në Beograd, i dolën edhe pjesëtar të “Beretave të Kuqe”, të cilët akuzohen për krime lufte në Kosovë.
