Raportuesi për Kosovën në Parlamentin Evropian, Riho Terras, ka përgëzuar kryeministrin Albin Kurti për marrëveshjen e arritur lidhur me zbatimin e Ligjit për të huajt dhe Ligjit për automjetet.
Terras theksoi se kjo marrëveshje është pozitive si për Bashkimin Evropian ashtu edhe për Kosovën.
Ai shtoi se është inkurajuese që në të ardhmen Përfaqësuesi Special i BE-së për Dialogun do të bashkëpunojë me Qeverinë e Kosovës dhe me komunitetin serb për integrimin e sektorëve të shëndetësisë dhe arsimit në kuadër të sistemit institucional të Kosovës, në përputhje me marrëveshjen e arritur.
“Është e jashtëzakonshme që në të ardhmen, Përfaqësuesi Special i BE-së për Dialogun do të punojë me Qeverinë e Kosovës dhe serbët për të integruar shëndetësinë dhe arsimin në kornizën e Kosovës në përputhje me marrëveshjen”, shkroi ai në një postim në X.
Ndërkohë, Qeveria e Kosovës ka vendosur që pjesëtarëve të komunitetit serb që nuk posedojnë dokumente të Kosovës t’u lëshohen leje të përkohshme qëndrimi me afat deri në 12 muaj. Gjithashtu, është vendosur të pranohen si dokument identifikimi edhe letërnjoftimet e lëshuara nga autoritetet serbe.
Vendimi u mor pas takimit që kryeministri Albin Kurti zhvilloi të shtunën me Përfaqësuesin Special të Bashkimit Evropian për dialogun Kosovë–Serbi, Peter Sorensen.
BE dhe Qeveria dakordohen për zbatimin e Ligjit për të Huajt nga e diela
