Takimin e nisën goxha herët.
Ballë për ballë njëri tjetrit, kryeministri Albin Kurti e emisari i BE-së për dialogun, Peter Sorensen, u panë që në orët e hershme të mëngjesit.
Pas bisedimeve të zhvilluara, dyshja iu drejtuan foltores për media.
E aty u konfirmua se tashmë nga e diela e 15 marsit, do të hyjë në fuqi Ligji për të huajt dhe ai për automjetet.
Sorensen, ndonëse tha se procesi i ndryshimeve ligjore kërkon kohë, përshëndeti përkushtimin e Qeverisë për zbatimin e ligjeve.
“Për të siguruar mosndërprerjen e shërbimeve, i kemi kërkuar Kosovës të lejojë përdorimin e letërnjoftimeve të lëshuara jo më vonë se 15 mars 2026 nga Serbia për ata që jetojnë në Kosovë, si mjet identifikimi për proceset administrative. Në të njëjtën kohë, Qeveria e Kosovës duhet të regjistrojë individët kualifikues në sistemin e Regjistrit Qendror të Gjendjes Civile të Kosovës sipas ligjit të Kosovës, sipas fakteve të gjendjes së tyre civile”.
Ndërkaq në anën tjetër, kryeministri Kurti sqaroi se si do të funksionojë i gjithë procesi.
“Qeveria do të pajiset nga krerët lokalë me lista të stafit shëndetësor dhe akademik që janë të angazhuar në ofrimin e këtyre shërbimeve. Lista që do shërbejnë si bazë për dhënien e lejeve të përkohshme të qëndrimit për qytetarët e huaj që aplikojnë në MPB. E njëjta vlen edhe për studentët e huaj që qëndrojnë në Kosovë, për të cilët krerët komunale do ofrojnë listën e plotë”, deklaroi Kurti.
E në këtë konferencë, i pranishëm ishte edhe shefi i Zyrës së BE-së në Prishtinë, Avio Orav.
Ai u shpreh se zbatimi i këtij ligjit është një hap i rëndësishëm drejt integrimit evropian.
“Sot në takim u fokusuam në zbatimin e plotë të Ligjit për të Huajt. Diskutuam për zbatimin që do të fillojë nesër. Kemi pasur biseda intensive me Qeverinë e Kosovës gjatë javëve të fundit dhe sot ka një pajtim për zbatimin e Ligjit për të Huajt me hapa shtesë substancial, para së gjithash në lidhje me procesin e regjistrimit të serbëve të Kosovës dhe lejeve të qëndrimit të përkohshëm”, tha Orav.
Ligjet për të huajt parasheh që të gjithë personat që nuk posedojnë dokumente të Kosovës të pajisen me leje qëndrimi, ndërsa automjetet me targa të huaja nuk do të mund të qarkullojnë në Kosovë për më shumë se tre muaj, përveç nëse kanë autorizim përkatës.
Megjithatë, pas takimit të së shtunës është vendosur që këto rregulla të mos zbatohen menjëherë për serbët e Kosovës pa dokumente kosovare.
Ata do të kenë mundësi të pajisen me leje të përkohshme qëndrimi deri në 12 muaj, si dhe të përdorin si dokument identifikimi letërnjoftimet e lëshuara nga struktura paralele në vend.
