Për vizitë zyrtare në Kosovë po qëndron, raportuesi i Kosovës në Parlamentin Evropian, Riho Terras.
Gjatë ditës diplomati evropian zhvilloi takim me shefin e BE-së në Kosovë, Aivo Orav.
Ky i fundit përmes një postimi në rrjetin social “X” tha se angazhimi i BE-së për Kosovën mbetet i madh.
“Angazhimi i Bashkimit Evropian me Kosovën, si në nivel lokal ashtu edhe nga Brukseli, mbetet i fortë si gjithmonë, me mundësi të reja të arritshme, përfshirë Planin e Rritjes”, ka thënë Orav.
Terras u prit në zyrë edhe nga presidentja e vendit, Vjosa Osmani, e cila mes tjerash i kërkoi heqjen e masave ndëshkuese ndaj Kosovës.
“Presidentja Osmani theksoi se, pavarësisht bashkëpunimit konstruktiv, vazhdimi i masave të BE-së ndaj Kosovës mbetet i pashpjegueshëm, i padrejtë dhe i paarsyeshëm. Në këtë kontekst, presidentja Osmani kërkoi mbështetjen e z. Terras për heqjen sa më të shpejtë të këtyre masave, duke rikujtuar se ato dëmtojnë qytetarët dhe minojnë besimin në procesin e integrimit, teksa Kosova ka përmbushur çdo kërkesë të paraqitur nga partnerët evropianë”, thuhet në njoftimin e presidencës.
Njësoj sikurse Osmani edhe raportuesi për Kosovën në Parlamentin Evropian kërkoi që menjëherë të hiqen masat ndëshkuese.
“Takim me Presidenten e Kosovës, Vjosa Osmani. Diskutuam për situatën politike dhe zgjedhjet e ardhshme të përgjithshme që do të mbahen më 28 dhjetor. Masat e BE-së ndaj Kosovës duhet të hiqen menjëherë”, është shprehur Terras.
Terras zhvilloi takime edhe me pjesëtarë të shoqërisë civile dhe gazetarë.
Kujtojmë që Bashkimi Evropian kishte paralajmëruar se masat ndaj Kosovës do të hiqen sapo të kryhej “transferimi normal i pushtetit lokal në komunat veriore”.
