Kreu i Partisë Demokratike të Kosovës, Bedri Hamza ka thënë se heqja e masave ndëshkuese ndaj vendit është vendim i vonuar, por i mirëpritur.
Në një shkrim në Facebook, ai ka rikujtuar se të njëjtat u vendosën si pasojë e tensioneve dhe moskoordinimit politik të Qeverisë Kurti.
Ai u shpreh tutje se qytetarët u ndëshkuan për shkak të papërgjegjësisë së Qeverisë.
“Për Evropën, problemi historikisht ka qenë Serbia dhe jo Kosova. Kosova është pjesë e forcimit të stabilitetit dhe sigurisë në rajonin tonë. Për rrjedhojë, këto masa ndëshkuese kanë prekur padrejtësisht qytetarët, ekonominë dhe perspektivën tonë evropiane.
Qytetarët tanë nuk do të duhej të ndëshkoheshin për shkak të papërgjegjësisë së Qeverisë.
Si vendi me qytetarët më proevropianë në Ballkanin Perëndimor, Kosova meriton trajtim të drejtë, mbështetje të plotë dhe një rrugë të qartë drejt integrimit evropian, pa pengesa që e vonojnë këtë proces” – ka shkruar ai.
