Një tërmet nënujor me magnitudë 6.1 ballë goditi ishullin grek të Kretës herët të enjten, duke u ndjerë në të gjithë rajonin e Detit Egje. Deri më tani, nuk janë raportuar të lënduar apo dëme serioze.
Sipas Institutit të Gjeodinamikës në Athinë, epiqendra e tërmetit ishte rreth 55 kilometra në veri të Kretës, në një thellësi prej 37 kilometrash nën shtratin e detit.
Në qytetin portual të Iraklios, një rrugë qendrore u mbyll përkohësisht pasi copa suva nga një ndërtesë e vjetër dhe e dëmtuar ranë në rrugë.
“Fatmirësisht, raportet e para tregojnë se për shkak të thellësisë së madhe të tërmetit, nuk ka pasur dëme të mëdha,” deklaroi Ministri i Mbrojtjes Civile, Ioannis Kefalogiannis, i cili më pas u nis drejt Kretës.
Lëkundjet u ndjenë në shumë ishuj të Egjeut, ndërsa ekipet e shpëtimit u dërguan në Kretë si masë paraprake, konfirmuan autoritetet.
Efthymios Lekkas, drejtori i Organizatës për Mbrojtjen nga Tërmetet dhe Planifikimin, shpjegoi se tërmetet që ndodhin në thellësi të mëdha kanë më pak gjasa të shkaktojnë dëme në sipërfaqe.
Greqia ndodhet në një zonë me aktivitet të lartë sizmik, për shkak të pranisë së disa të çarave të mëdha tektonike.
