Bekim Haxhiu nga Partia Demokratike e Kosovës e ka dënuar ashpër vjedhjen e votave nga kandidatët për deputetë në zgjedhjet e parakohshme parlamentare të 28 dhjetorit të vitit të kaluar, duke e cilësuar këtë veprim si të gabuar dhe të pajustifikueshëm.
Duke folur në emisionin “Info Nata” në Tëvë1, Haxhiu ka thënë se vjedhja e votave nuk ka asnjë arsyetim për asnjë subjekt politik apo individ që ka ndërhyrë në kutitë e votimit dhe ka devijuar vullnetin e qytetarëve të Kosovës.
Ai ka theksuar se një veprim i tillë ka pasoja zinxhirore, pasi sipas tij jo vetëm që e ul besimin e qytetarëve për të dalë në zgjedhje, por vë në pikëpyetje edhe kredibilitetin e deputetëve.
“Nuk po flas vetëm për emra të veçantë, por po e kontestoj dhe kundërshtoj krejt procesin. Kushdo që ka prekur një votë ka gabuar dhe duhet ta marrë dënimin e merituar. Qoftë ai që ia ka vjedhur dikujt 10 vota apo 1 mijë vota, kjo mbetet hajni dhe nuk ka asnjë arsyetim”, është shprehur Haxhiu.
Sipas tij, përgjegjësi për këtë situatë mban edhe Komisioni Qendror i Zgjedhjeve, i cili, siç tha ai, ka dështuar ta monitorojë procesin zgjedhor në qendrat komunale të votimit.
“Po të mos ishin ankesat, ky proces do të kishte mbetur i heshtur. Nuk dua t’i amnistoj ata që kanë bërë veprime të gabuara, por përgjegjësia është edhe te ata që kanë për detyrë të monitorojnë procesin. Nuk amnistohet asnjë anëtar i KQZ-së dhe asnjë nga ata që kanë qenë në udhëheqje në qendrat komunale të votimit”, ka theksuar ai.
Haxhiu ka shtuar se është detyrë e KQZ-së që procesin e numërimit të votave të mos ia besojë më askujt, duke nënvizuar se kjo çështje mund të rregullohet përmes një sistemi digjital, siç aplikohet edhe në vende të tjera.
