Dogana e Kosovës ka njoftuar se ka realizuar një operacion të suksesshëm në Pikën Kufitare të Vërmicës, duke parandaluar kontrabandën e mallrave të dyshuara si të falsifikuara.
Sipas komunikatës zyrtare, gjatë operacionit është zbuluar një tentativë për të futur në territorin e Kosovës mbathje sportive me marka të mbrojtura, të dyshuara si të falsifikuara. Pas zbulimit të rastit, janë njoftuar Hetuesit e Doganës të cilët, në bashkëpunim me Prokurorinë kompetente, kanë ndërmarrë veprime të menjëhershme hetimore.
Hetimet kanë nxjerrë në pah prova që tregojnë se një zyrtar doganor ka dështuar të përmbushë detyrimet ligjore, duke lejuar hyrjen e mallrave pa kontroll dhe duke shmangur pagesën e taksave doganore. Po ashtu, është identifikuar edhe vozitësi i automjetit transportues si i përfshirë në veprimtari të kundërligjshme.
Me urdhër të Prokurorit të Shtetit, të dy të dyshuarit janë ndaluar për 48 orë:
Zyrtari doganor për veprën penale “Keqpërdorim i detyrës zyrtare”;
Vozitësi i automjetit transportues për veprat penale “Kontrabandim i mallrave” dhe “Shmangie nga pagesa e detyrimeve doganore”.
Dogana e Kosovës ka theksuar përkushtimin për mbrojtjen e integritetit institucional dhe luftimin e çdo forme të paligjshmërisë që dëmton ekonominë e vendit, duke ndjekur penalisht çdo rast abuzimi me detyrë.
