Për ditën e 17- të të fushatës zgjedhore, kandidati për kryeministër nga radhët e Lëvizjes Vetëvendosje Albin Kurti zgjodhi Komunën e Skenderajt.
Por me të arritur Kurti në ambientet ku pritej të mbahej tubimi elektoral, filluan tensionet.
Qytetarët që ishin grumbulluar para Pallatit të Kulturës në Skenderaj kanë brohoritur “Hashim Thaçi”, “UÇK”, “PDK” dhe ‘Albin Hajni’ derisa Kurti ishte duke hyrë brenda në sallë.
Ndaj tij hodhën mjete piroteknike dhe gurë.
Si pasojë, është dashur të intervenojë edhe Policia e Kosovës, të cilët i larguan turmën duke përdorur sprej.
Madje, një protestues u prangos nga Policia e Kosovës.
E Ministri i Kulturës, Hajrulla Çeku, i ka quajtur “qyqanë të orkestruar” qytetarët që tentuan të pengonin tubimin e kësaj partie.
“Disa qyqanë të orkestruar nga partia paskan tentu me e pengu tubimin e Vetëvendosjes në Skënderaj. Për çudi, komuna paralele e Serbisë atje nuk ju bënte fort përshtypje. Harroni që na ndalni. Po thyejm bastione një nga një, cep më cep. Dje në Deçan, sot në Drenicë, e çdo ditë deri në 500 mijë zemrat e 9 shkurtit. Politika primitive nuk kalon”.
Me t’u shpërndarë turmat, Lëvizja Vetëvendosje publikoi një video në Facebook ku shihet Albin Kurti duke u takuar me mbështetësit e tij në Skënderaj.
Aty thuhet se ka dështuar përpjekja për ta pamundësuar tubimin në këtë qytet dhe se Lëvizja Vetëvendosje vazhdon cep më cep vendit.
