Protesta e qytetarëve kundër projektit të investimit në Zvërnec është kthyer në kryefjalë të debatit politik në Kuvendin e Shqipërisë, ku mes përplasjeve të forta është kërkuar ngritja e një hetimi parlamentar dhe është hedhur poshtë kërkesa e opozitës.
Kryedemokrati Sali Berisha akuzoi qeverinë për injorim të protestuesve, duke kërkuar që kryeministri Edi Rama të paraqitet në Kuvend për dorëheqje ose mocion me debat.
Sipas tij, situata përbën “akt tradhtie dhe cinizmi ndaj qytetarëve shqiptarë”, ndërsa theksoi se protestuesit kanë zhvilluar prej ditësh tubime me flamuj dhe kërkesa për të drejtat e tyre.
Berisha kërkoi gjithashtu ngritjen e një hetimi parlamentar, duke deklaruar se “zëri i qytetarëve nuk mund të mposhtet”, ndërsa paralajmëroi se ata që i injorojnë kërkesat do të përballen me reagim publik.
“Të paraqitet Rama këtu për të paraqitur dorëheqjen ose mocion me debat, është një akt sa tradhëtie dhe cinizmi mes qytetarëve shqiptarë. S’keni të drejtë të injoroni qindra-mijëra qytetarë që kanë 18 ditë me flamurin e lirisë në dorë, me flamurin e ligjit dhe të drejtave të njeriut. Sakrifikojnë orë të tëra. Kush tregohet fashist tani apo stalinist tani, ju apo ata, këtë e gjykojnë qytetarët. Por ju s’mund t’i injoroni ata. Ata kanë kërkesa të drejta.
Urgjent hetim parlamentar, larg duart nga protesta. Zëri i qytetarëve nuyk mposhtet kurrë, pastaj do ikni si minj”, deklaroi Berisha.
Nga ana tjetër, kreu i grupit parlamentar të Partisë Socialiste, Taulant Balla, e cilësoi kërkesën e opozitës të paargumentuar dhe jashtë procedurave parlamentare.
Ai deklaroi se kërkesa nuk plotëson kriteret dhe nuk do të merret në shqyrtim, duke shtuar se në debat nuk u paraqit asnjë argument konkret.
Balla iu përgjigj ashpër akuzave të opozitës, duke e sfiduar Berishën të marrë pjesë në protestë dhe duke e akuzuar për qëndrime kontradiktore ndaj saj.
Ai u shpreh se protestuesit kanë bërë edhe thirrje kundër liderit të opozitës, ndërsa shtoi se çështja po përdoret politikisht.
“Z.kryetar, kërkesa është e formuluar gabim dhe nuk merret në konsideratë. Nuk dëgjuam asnjë argument për kërkesën. Kërkesa nga grupi ynë parlamentar do rrëzohet. Kemi pasur diskutim të gjatë kuvetë deputetët kanë kërkuar që këto iniciativa ligjore të dëgjohen me përparësi, nuk dëgjuam asnjë argument që lidhet me kërkesën. I fundit që mund të flasë në emër të protestuesve është ky pelikani këtu.Nëser do, të zbatosh, unë të sfidoj Sali Berisha sot pasdite shko në protestë. Shkon dot në protestë? Provoje po ta mbajti. Nga ana e protestuesve e meritoj një falenderim, ata thonë Berisha në burg, unë e kam bërë një kallëzim për ty. I ftoj protestuesit ta marrin në shqyrtim”, deklaroi Balla./rtsh.al/
