Autore: Adea Mustafaj
Në hyrje të teatrit “Istreg Begolli”, në Pejë qëndron ende kalendari kulturor.
Por, në këtë objekt nuk luhet asnjë shfaqje teatrale që 24 muaj.
Kjo për shkak se ky teatër, është ende në renovim.
Punimet nisën para dy vitesh, por ende nuk kanë përfunduar.
Për qytetarët e Pejës, kthimi i teatrit është më shumë se i nevojshëm, për jetën kulturore të këtij qyteti.
“Që një kohë, nuk muj me se sa është koha e saktë po ka një kohë që ky teatër nuk funksionon….. Kish qenë mirë që ky teatër me u rregullu edhe me qenë në funksion. Sa i përket kësaj rinie, me pas rinia ku me u argëtu”, thotë Ibrahim Beqiraj
.
Ndërsa, Shukrije Demaj,shprehet “Me pas rinia shfaqje, me pa diçka të re. Me i njoftu fëmijët, kanë nevojë fëmijët për teatër. Teatri është shumë i mirë për fëmijë, për rini për gjithë. Unë jetoj në Norvergji. Atje teatrit i jepin shumë rëndësi”.
Megjithatë aktorët luajnë në shfaqje në hapësira tjera të inskenuara.
“Teatri i Pejës ka pasur shfaqje vazhdimisht deri në fazën kur kanë filluar punimet. Pasi kanë filluar punimet në teatër, është e kuptueshme që deri në përfundim të tyre nuk mund të inskenohen shfaqje në atë skenë. Ne si staf, drejtoresha, stafi teknik dhe aktorët, kemi vazhduar të punojmë duke gjetur alternativa të tjera, p.sh.: në hapësira publike, salla shkollore, në Galerinë e Arteve etj. Kemi krijuar kampanja të ndryshme vetëdijesimi dhe shfaqje të llojeve të ndryshme. Ne nuk jemi ndalur së punuari (brenda mundësive), edhe pse asnjëherë nuk është e mjaftueshme në këtë profesion”, thotë Luan Daci – aktor.
Drejtoresha e këtij teatri, Krenare Luta për Tëvë1 ka thënë se vonesat kanë ardhur si rezultat i problemeve kontraktuale dhe kompleksitetit teknik të renovimit.
Ndërsa tutje shtoi se teatri pritet të jetë në funksion gjatë vitit.
“Aktualisht janë drejt përfundimit punimet e fazës së dytë, ndërsa mbetet për t’u realizuar faza e tretë, e cila përfshin instalimin e ndriçimit, sistemit të zërit dhe pajisjeve teknike të skenës. Për këtë fazë është kërkuar mbështetje nga Ministria e Kulturës, Rinisë dhe Sportit (MKRS). Nëse sigurohet mbështetja e nevojshme financiare për fazën e tretë, pritet që objekti të jetë funksional gjatë vitit 2025, duke mundësuar rikthimin e trupës së aktorëve dhe shfaqjeve në skenën e tyre të rregullt”, ka thënë ajo.
Pavarësisht që objekti ka qenë jo funksional shfaqjet teatrore dhe aktivitetet artistike janë mbajtur në hapësira alternative, si: Galeria e Arteve në Pejë, objektet shkollore në kuadër të programit “Arti në shkolla”, si dhe në kuadër të fushatave për ngritjen e vetëdijes kulturore dhe artistike në komunitet.
