Një person është arrestuar pas një rasti të kanosjes dhe të shtënave me armë zjarri në fshatin Raçë të Gjakovës.
Sipas njoftimit të Policisë së Kosovës, rasti ka ndodhur të enjten, më 10 korrik, pasi policia ka pranuar informacion përmes linjës telefonike lidhur me të shtënat me armë zjarri.
Njësitë relevante policore kanë reaguar menjëherë dhe, gjatë ekzaminimit të vendit të ngjarjes, kanë gjetur një gëzhojë të kalibrit 7.62×39 milimetra.
I dyshuari, mashkull në moshë madhore, është arrestuar dhe ka dorëzuar armën e përdorur, si dhe 11 fishekë të kalibrit 7.62×39 milimetra.
Me vendim të Prokurorit të Shtetit, ai është ndaluar për 48 orë, ndërsa ndaj tij janë iniciuar procedura për veprat penale “Mbajtja në pronësi, kontroll ose posedim të paautorizuar të armëve”, “Përdorimi i armës apo mjetit të rrezikshëm” dhe “Kanosja”./teve1.info/
