Persona të panjohur dyshohet se kanë shtënë me armë zjarri në drejtim të një autosalloni në magjistralen Prishtinë–Ferizaj, në orët e para të mëngjesit të së shtunës.
Sipas Policisë së Kosovës, të dyshuarit ishin të veshur me rroba të zeza dhe mbanin helmeta, teksa po lëviznin me motoçikletë.
Si pasojë e të shtënave janë dëmtuar rreth gjashtë vetura dhe katër xhama të objektit, ndërsa vlera e dëmit material ende nuk është përcaktuar.
Në vendin e ngjarjes, njësitet policore kanë gjetur dhe sekuestruar 16 gëzhoja.
Lidhur me rastin është njoftuar prokurori kompetent, ndërsa rasti është iniciuar si “Shkaktim i rrezikut të përgjithshëm” dhe “Mbajtje në pronësi, kontroll apo posedim të paautorizuar të armës” dhe vazhdon të jetë nën hetime.
