Për zgjedhjet e përgjithshme të 9 shkurtit, të drejtën e votës do të mund ta ushtrojnë edhe të akuzuarit që ndodhen në paraburgim në Hagë.
Kjo është konfirmuar nga Gjykata Speciale, por duke mos treguar kohën se kur ish krerët e UÇK-së, do të votojnë.
“Janë marrë të gjitha masat që të paraburgosurit të mund të ushtrojnë të drejtat e tyre si qytetarë të Kosovës për të votuar në zgjedhjet e ardhshme. Nëse të arrestuarit vendosin të votojnë dhe kur e bëjnë këtë është çështje e tyre private dhe si e tillë nuk mund të komentojmë”, tha zëdhënësi i Dhomave të Specializuara të Kosovës, Michael Doyle.
Kurse nga Komisioni Qendror i Zgjedhjeve kanë thënë se procesi i votimit do të bëhet në përputhje me rregullat e KQZ-së.
Krjimi i kësaj mundësie, llogaritet si përmbushje e të drejtave të garantuara me Kushtetutë.
“Kjo çështje ka qenë e rregulluar me Ligjin për Zgjedhjet e Përgjithshme dhe të gjithë ata persona që janë të paraburgosur dhe janë qytetarë të Republikës së Kosovës kanë të drejtë vote. Sigurisht që edhe në të kaluarën personat që kanë qenë nëpër burgje apo kanë qenë të paraburgosur, kanë pasur të drejtë vote dhe kjo e drejtë është e garantuar me Kushtetutën e Kosovës dhe Ligjin për Zgjedhjet e Përgjithshme”, tha Amer Alija, Fondi për të Drejtën Humanitare.
Aktualisht në qendrën e paraburgimit në Hagë, ndodhen 12 persona, disa të akuzuar për krime lufte e disa të tjerë për pengim dhe ndërhyrje në drejtësi.
