Presidentja Vjosa Osmani ka dalur me një zgjidhje, pasi Shtetet e Bashkuara të Amerikës ia vendosën një tarifë prej 10% produkteve që Kosova i exporton në SHBA.
Propozimi i Presidentes, të cilin ia ka dërguar qeverisë, është që Kosova t’i heq të gjitha tarifat ndaj produkteve amerikane.
“Ky është një hap i rëndësishëm për të thelluar lidhjet ekonomike me aleatin tonë më të ngushtë dhe për të dërguar një mesazh të qartë: Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata”, është shprehur Osmani.
E tarifa e SHBA-së ndaj Kosovës, përkundër që është shumë më e ulët se e shumë shteteve të tjera, i ka shqetësuar ekonomistët.
“Kjo tarifë doganore do të ndikojë në produktet e tona që të mos dalim me çmimin e njejtë që kanë dalë deri më tani në tregun e SHBA dhe po ashtu nuk do ti bëjë konkurrentë sic kanë qenë deri më sot dhe si rrjedhojë e kësaj mund të vijë edhe deri te ulja e kërkesës për produktet e Kosovës. Për këtë arsye ne si odë i bëjmë thirrje Qeverisë së Kosovës që të ndërmarrin masa në lobim për me u largu ose me u pezullu ky tatim doganor”, ka thënë Lulzim Rafuna, kryetar i Odes Ekonomike të Kosovës.
Ndërsa, profesori Shumbin Misini thotë se vendimi do të ketë një ndikim zingjiror.
“Kosova që nga viti 2022 kemi zvogëlim të eksportit për vendet e Shteteve të Bashkuara të Amerikës. Dallimi në mes të vitit 2023 dhe 2024 kemi një zvogëlim nga 106 milionë euro që kemi pasë eksport në SHBA ka ra në 40 milionë. A do të ndikojë drejtpërdrejtë tek shitja e produkteve të Kosovës në vendet e SHBA, kjo do të ketë efekt zingjiror për shkak që në coftë se rritet çmimi i taksave prej 10% rritet çmimi i produktit prej 10%”, është shprehur Misini.
E sipas Dhomës së Tregtisë dhe Industrisë në Kosovë, pritet ta godas edhe më shumë eksportin.
