Kapiteni i Kombëtares së Shqipërisë, Berat Gjimshiti është në listën e mbrojtësve që skuadra e Milanit po synon ta transferojë këtë verë.
Mediumet italiane kanë njoftuar të martën se drejtori sportiv i Milanit, Igli Tare po e monitoron nga afër situatën e Gjimshitit tek Atalanta, ekip që u ka rezistuar ofertave nga Lindja e Mesme për mbrojtësin.
Gjimshiti pëlqehet edhe nga trajneri Massimiliano Allegri që po kërkon një mbrojtës me përvojë dhe për këtë arsye Milani pritet së shpejti ta kontaktoj Atalantan.
32-vjeçari ka kontratë me Atalantan deri në vitin e ardhshëm kurse kartoni i tij vlerësohet rreth 6 milionë euro.
Gjimshiti prej vitit 2016 bën karrierë në Itali, pasi ka luajtur edhe për Avellinon e Beneventon kurse sezonin e shkuar në 34 ndeshje në Serie A, pati edhe 1 gol e 2 asistime.
